Ambasadori i Delegacionit të Bashkimit Europian në Shqipëri, Silvio Gonzato, u shpreh se Bashkimi Europian ndjek nga afër nismën ligjore të Partisë Socialiste për ndryshimin e nenit 242 të Kodit të Procedurës Penale, që ka të bëjë me pezullimin e ministrave dhe zyrtarëve të lartë.
Gonzato theksoi se Reforma në Drejtësi e vitit 2016 nuk duhet të preket dhe presin që qeveria shqiptare të konsultahet për çdo iniciativë të tillë. "Siç e dini, ne i ndjekim nga afër të gjitha nismat që kanë lidhje me shtetin ligjor. Edhe që të mos prekin parimet e Reformës në Drejtësi të vitit 2016. Dhe presim që qeveria shqiptare të konsultohet me ne për çdo iniciativë", tha ai.
Deklarata u bë gjatë një takimi me gazetarët, ku ambasadori u pyet pikërisht për këtë propozim. Ai nuk dha komente të mëtejshme për ndikimin e mundshëm të ndryshimeve.
Kryetari i Komisionit për Çështjet e Jashtme në Parlamentin Europian, David McAllister, nuk e komentoi drejtpërdrejt çështjen, por u shpreh se është në një linjë me pozicionin e Gonzatos.