Mëngjesin e së hënës, në autostradën 613 që lidh qytetet Leçe dhe Brindisi në Itali, pranë zonës Tuturano, një grup grabitësish të maskuar ka bllokuar qarkullimin dhe ka hedhur në erë një automjet blinduar të kompanisë së sigurisë Battistolli (BTV), i cili transportonte para.
Grabitësit përdorën makina me drita sinjalizuese të rreme për t’u kamufluar si automjete policie. Ata veshën tuta të bardha dhe mbajtën armë, ndërsa pamjet e publikuara nga mediat italiane, përfshirë video nga deputeti Claudio Stefanazzi, tregojnë momentin e shpërthimit dhe largimin e tyre të shpejtë.
Sipas disa raportimeve, ndodhi një shkëmbim zjarri me karabinierët, por nuk raportohen të lënduar. Një burim tjetër thekson se grabitja nuk u krye plotësisht, ndërsa dyshohet se grabitësit vodhën makina nga shoferët për arratisje. Autoritetet vlerësojnë se grupi përbëhej nga të paktën katër deri në gjashtë persona.
Policia italiane, konkretisht karabinierët e komandës provinciale të Leçes, nisi menjëherë një operacion kërkimi. Ata gjetën një Alfa Romeo të braktisur në një rrugë rurale dhe arrestuan një burrë me kapuç, i paarmatosur. Një person i dytë u ndalua teksa largohej në këmbë. Pranë vendit u gjet edhe një xhip i planifikuar për arratisje.
Kërkimet për të paktën dy grabitës të tjerë vazhdojnë, ndërsa hetimet synojnë identifikimin e të gjithë të përfshirëve dhe zbardhjen e dinamikës së ngjarjes.
Përditësime
Grabitësit sulmuan dy mjete blinduara Battistolli, jo një siç raportohej më parë.
Ata dogjën një kamion të rëndë për të bllokuar karrexhatë dhe izoluar zonën, duke krijuar tym të zi të dukshëm nga distanca.
Sipas Corriere della Sera, grabitësit ishin të armatosur me kallashnikovë.
Rojet u detyruan të zbresin para shpërthimit.
Gjatë arratisjes ndodhi një shkëmbim zjarri në zonën e Squinzanos.
Ndërhynë zjarrfikësit, forcat e rendit dhe shërbimi i urgjencës mjekësore.
Ngjarja ngjan me grabitjen e korrikut 2024 në të njëjtën rrugë.