Muzeu i dedikuar krijimtarisë së René Lalique, mjeshtrit të stilit Art Nouveau dhe Art Deco, u bë objekt i një grabitjeje në orët e para të mëngjesit të së dielës. Autorët, të cilët dyshohet se kanë qenë të mirëinformuar, hynë me forcë në ambientet e muzeut në Wingen-sur-Moder dhe thyen gjashtë vitrina ekspozimi.
Sipas hetimeve, autorët u drejtuan menjëherë drejt sallës ku ekspozoheshin bizhuteritë. Kryetari i bashkisë së Wingen-sur-Moder, Christian Dorschner, vuri në pikëpyetje reagimin e kompanisë private të sigurisë, pasi alarmi u aktivizua, por nuk u njoftua menjëherë policia. Ishte një punonjëse pastrimi ajo që konstatoi e para vjedhjen dhe njoftoi forcat e rendit.
Drejtuesit e muzeut njoftuan se institucioni do të mbetet i mbyllur për disa ditë për shkak të ngjarjes. Kjo grabitje vjen në një periudhë shqetësimesh në rritje për sigurinë në muzetë francezë, veçanërisht pas incidentit të tetorit 2025 në Muzeun e Luvrit.
Momentalisht, njësia e hetimeve kriminale e xhandarmërisë së Bas-Rhin po analizon pamjet e kamerave të sigurisë për të identifikuar autorët. Edhe pse vlera e saktë është ende në proces vlerësimi, burimet hetimore konfirmojnë se dëmi arrin shifrën prej 4 milionë eurosh.
Përditësime
Autoritetet kanë zbardhur detaje të reja mbi grabitjen në muzeun Lalique në Francë, i cili funksionon prej vitit 2011. Sipas hetuesve, vlera e bizhuterive të vjedhura arrin në 102 milionë dollarë, ndërsa pamjet e kamerave të sigurisë tregojnë se autorët e realizuan grabitjen në më pak se 8 minuta.