Në Spitalin e Elbasanit, repartin e Pediatrisë e ka mbingarkuar një valë e fortë gripi dhe virozash stinore, duke çuar në mbi 110 fëmijë të paraqitur çdo ditë në urgjencë. Fluksi ka nisur që nga festat e fundvitit dhe vazhdon me intensitet të lartë, ndërsa shtrimet kanë arritur nivele rekord për vitet e fundit.
Sipas shefes së Pediatrisë, Irena Palloshi, fëmijët paraqiten kryesisht me temperaturë të lartë "rebele", probleme në rrugët respiratore, kollë të fortë dhe vështirësi në frymëmarrje. Në shumë raste, simptomat shoqërohen me komplikacione virale që kërkojnë monitorim spitalor. Mjekja Palloshi vë në dukje se viroza respiratore ka zëvendësuar atë gastrointestinale, me rritje të rasteve edhe tek foshnjat nën tre muajsh.
Nga fillimi i janarit deri më tani, rreth 1350 fëmijë kanë marrë ndihmën e parë në pavijon, ndërsa mbi 575 raste kanë përfunduar me shtrim. Mjekët e lidhin përhapjen me ndryshimet e shpeshta të motit dhe apelojnë që prindërit të shmangin grumbullimet dhe ambientet e mbyllura.
Irena Palloshi u kërkon prindërve të paraqiten menjëherë në spital nëse fëmijët shfaqin temperaturë të lartë të vazhdueshme, kollë të fortë, vështirësi respiratore, të vjella ose përkeqësim të gjendjes së përgjithshme. Strukturat shëndetësore në Elbasan janë në gatishmëri të plotë për të menaxhuar fluksin dhe për të parandaluar komplikacionet.