Grupi Parlamentar i Partisë Socialiste mblidhet të hënën në orën 10:00 të paradites për të diskutuar dhe vendosur në lidhje me kërkesën e SPAK-ut për lëshimin e autorizimit të arrestimit të ish-zëvendëskryeministres Belinda Balluku.
Dy burime nga Grupi i PS-ë thanë gazetarit të Top Channel Muhamed Veliu se pritet leximi i raportit të përgatitur nga pesë anëtarët socialistë të Këshillit të Mandateve dhe Imunitetit. Raportin e ka hartuar Ulsi Manja.
Parashikohet që kryetari i PS-ë Edi Rama të mbajë një fjalë me qëndrimin politik përfundimtar ndaj kësaj kërkese të SPAK-ut, e paraqitur më 16 dhjetor të vitit të shkuar.
Deputetët socialistë janë njoftuar nga kryetari i grupit Taulant Balla për pjesëmarrje të detyrueshme në mbledhje.
Dy raportet, ai i shumicës socialiste dhe ai i opozitës, pritet të lexohen, diskutohen dhe votohen në seancën parlamentare të enjtes më 12 mars. Burime nga shumica socialiste nuk përjashtojnë mundësinë që vetë deputetja Belinda Balluku të mbajë fjalë në atë seancë për të paraqitur versionin e saj.
Përditësime
Belinda Balluku pritet të marrë pjesë në mbledhjen e grupit parlamentar të PS-së nesër, ku fjalimi i Edi Ramës do të transmetohet live.
PS argumenton mungesën e arsyeve për autorizimin e arrestit të saj, pasi Balluku është larguar nga detyra – siç e deklaroi Rama në mbledhjen e mëparshme.
PD publikoi raportin e plotë, duke mbështetur kërkesën e SPAK-ut.
Akuzat lidhen me tenderat për ndërtimin e tunelit të Llogarasë dhe 7 lotet e Unazës së Madhe, për shkelje të barazisë.
Burimet thonë se Grupi i PS-së nuk do t'i japë përgjigje pozitive kërkesës së SPAK-ut për arrestin e Ballukut
Kryeministri Edi Rama postoi në platformën X njoftimin për transmetimin LIVE të mbledhjes së grupit parlamentar të PS-së sot në orën 10:00. Teksti: “Sot në 10:00 do të jemi LIVE në Grupin Parlamentar për marrjen e qëndrimit ndaj kërkesës së prokurorit për kufizimin e lirisë së Belinda Ballukut.”