Grupi Parlamentar i Partisë Socialiste do të mblidhet më 28 mars në një forum të gjerë koordinimi politik e institucional. Në këtë takim pritet të marrin pjesë deputetët socialistë, ministrat e kabinetit qeveritar dhe drejtues institucionesh. Qëllimi kryesor është shqyrtimi i sfidave parlamentare dhe axhendës ligjore për javët në vijim.
Sipas agjendës, fjalën hapëse pritet ta mbajë kreu i Grupit Parlamentar, Taulant Balla, i cili do të paraqesë prioritetet dhe sfidat kryesore në Kuvend. Më pas, pritet të adresojë Kryeministri Edi Rama, i cili do të japë orientime politike dhe do të ndalet te reformat si dhe projektligjet kryesore.
Pjesë e diskutimeve priten të jenë raportimet nga drejtuesja e Kadastrës, Lorena Goxhobelli, dhe bashkëkryetari i Partisë Socialiste për Reformën Territoriale, Arbian Mazniku. Ky i fundit pritet të prezantojë ecurinë dhe hapat e mëtejshëm të kësaj reforme.
Në qendër të mbledhjes priten të vendosen nisma ligjore të rëndësishme, si Kodi i ri Penal dhe ligji për referendumin, i cili pritet të depozitohet së shpejti në Kuvend. Po ashtu, vëmendje kushtohet reformave jozgjedhore, veçanërisht asaj territoriale, si dhe reformës zgjedhore.
Mbledhja pritet të mbyllet me konkluzionet përkatëse dhe përcaktimin e hapave konkretë për përballimin e sfidave parlamentare në periudhën e ardhshme.