Ministria e Arsimit dhe Shkencës ka njoftuar zyrtarisht hapjen e procesit të aplikimit për subvencionimin e teksteve dhe materialeve shkollore për nxënësit e arsimit fillor të ulët dhe të mesëm të ulët, përkatësisht për nxënësit nga klasa e 1-rë deri në të 9-ën. Procesi ka filluar më 27 korrik dhe do të mbetet i hapur për një periudhë prej dy javësh, deri më 9 gusht 2026.
Sipas njoftimit, aplikimi realizohet ekskluzivisht përmes platformës eKosova. Ministria ka theksuar rëndësinë që prindërit dhe kujdestarët të sigurohen se të dhënat e tyre në platformë janë të përditësuara dhe se xhirollogaritë bankare të tyre janë aktive dhe të sakta, pasi mjetet financiare do të derdhen drejtpërdrejt në këto llogari.
Rregullat për shtetasit e huaj dhe verifikimi
E drejta për të aplikuar u është mundësuar edhe shtetasve të huaj që posedojnë leje qëndrimi të përkohshme ose të përhershme në Republikën e Kosovës, për fëmijët që vijojnë mësimin në institucionet arsimore vendore. Për shtetasit e huaj që nuk posedojnë ende leje qëndrimi, por kanë fëmijët e regjistruar në shkolla, Ministria do t’ia përcjellë listën e rasteve Agjencisë për Shoqërinë e Informacionit (ASHI) për të mundësuar qasjen në platformë. Dokumentacioni për këtë kategori duhet të dërgohet në adresën elektronike: libri@rks-gov.net.
Të gjitha aplikimet do t’i nënshtrohen procesit të verifikimit nga shkollat përkatëse, përmes koordinatorëve të autorizuar. Për çdo paqartësi, qytetarët mund të kontaktojnë Ministrinë në numrin e telefonit +383 (0) 38 200 65 049 ose përmes emailit.
Përgjegjësia mbi tekstet shkollore
Ministria ka rikujtuar zbatimin e Udhëzimit Administrativ nr. 13/2016, i cili përcakton përgjegjësinë e prindërve dhe nxënësve për ruajtjen e teksteve shkollore. Tekstet duhet të kthehen në shkollë në gjendje të rregullt në fund të vitit mësimor. Në rast dëmtimi me dashje, pakujdesie ose humbjeje, prindërit obligohen t’i zëvendësojnë ose kompensojnë ato pranë kujdestarëve të klasës.