Ish-kryeministri Ramush Haradinaj, në një prononcim për emisionin Pressing në T7, ka sqaruar qëndrimin e Aleancës për Ardhmërinë e Kosovës (AAK) lidhur me zhvillimet politike. Ai deklaroi se partia e tij nuk ka ambicie për të qenë pjesë e Qeverisë Kurti dhe se nuk ekziston asnjë interesim për koalicion.
Në lidhje me raportet ndërmjet pozitës dhe opozitës, Haradinaj vlerësoi se kryeministri Albin Kurti synon kontrollin total, duke shtuar se ai e sheh Lidhjen Demokratike të Kosovës (LDK) si material të përshtatshëm për këtë qëllim.
Sa i përket bashkëpunimit opozitar, Haradinaj bëri thirrje për një marrëveshje mes subjekteve politike. Ai pranoi se arritja e një dakordimi të tillë nuk është e lehtë, për shkak të ambicieve të ndryshme që ekzistojnë brenda spektrit opozitar. Ai konfirmoi se AAK nuk po vendos kushte për bashkëpunim dhe përjashtoi kategorikisht mundësinë e kërkesës për postin e Presidentit të vendit.