Kryetari i Aleancës për Ardhmërinë e Kosovës, Ramush Haradinaj, ka bërë homazhe te busti i veprimtarit Mentor Tolaj me rastin e 35-vjetorit të rënies së tij.
Në një postim në Facebook, Haradinaj e përshkroi Tolajn si një veprimtar të guximshëm që qysh herët iu kundërvu regjimit jugosllav. Ai tha se nga brezi i tyre, Tolaj dallohej për guximin dhe vendosmërinë për t’u përballur me armikun, ndërsa heroizmi i tij dha mesazhin se populli shqiptar nuk pranonte të jetonte në robëri.
Haradinaj shtoi se liria për të cilën luftoi Tolaj u realizua më vonë me luftën e lavdishme të Ushtrisë Çlirimtare të Kosovës. Ai mbylli postimin me fjalët: "Lavdi Mentor Tolajt dhe të gjithë të rënëve për liri!"