Ish-kryeministri Ramush Haradinaj ka zhvilluar një takim me qytetarë në Rahovec, ku ka kritikuar qëndrimet e kryeministrit Albin Kurti. Gjatë fjalës së tij, Haradinaj deklaroi se banorët e këtij qyteti janë plotësisht të vetëdijshëm për historinë dhe identitetin e tyre, duke hedhur poshtë pretendimet e atyre që, sipas tij, përpiqen t'u japin mësime për rrënjët e tyre.
Sipas Haradinajt, Rahoveci është një vend me histori të veçantë sakrificash dhe si i tillë, meriton vlerësim për punën e ndershme. Ai theksoi se nuk ka vendbanim në këtë zonë që nuk i ka përjetuar dhimbjet dhe plagët e luftës, duke e cilësuar qytetin si "martir të lirisë".
Ky takim zhvillohet në kuadër të fushatës elektorale për zgjedhjet e parakohshme që do të mbahen më 7 qershor. Aleanca për Ardhmërinë e Kosovës ka konfirmuar zyrtarisht pjesëmarrjen e saj në këtë garë me listën që mban numrin 128, ndërsa kandidati i propozuar nga kjo parti për postin e kryeministrit është Ardian Gjini.