Ish-presidenti i Kosovës, Hashim Thaçi, ka hequr dorë zyrtarisht nga kërkesa për rishikimin e vendimit të gjyqtarit të vetëm, Christopher Gosnell, i cili ndalon vizitat e tij me 10 persona të caktuar. Ky zhvillim u bë i ditur nëpërmjet kundërpërgjigjes së ekipit mbrojtës të Thaçit ndaj Zyrës së Prokurorit të Specializuar (ZPS), në kuadër të procedurave për kërkesën e lirimit me kusht kundrejt një dorëzanie prej 50.000 eurosh.
Sipas informacioneve, vendimi fillestar për ndalimin e vizitave u mor në korrik të vitit 2025 dhe përfshinte fillimisht 11 persona. Pas heqjes së masës për njërin prej tyre, mbrojtja e Thaçit vendosi në janar të këtij viti të mos vazhdojë më tej me kërkesën për rishikim të vendimit për 10 personat e mbetur.
Gazetarja Rina Mujku, duke raportuar për këtë zhvillim në emisionin "Info Magazine" në Klan Kosova, sqaroi se qëndrimi i mbrojtjes është se ish-presidenti nuk ka pasur dhe nuk ka për qëllim realizimin e vizitave apo kontakteve me personat në fjalë. Ky argument përdoret për të kundërshtuar pretendimet e prokurorisë se takimet e mundshme do të ndikonin në procesin gjyqësor. Mbrojtja thekson se ky qëndrim do të ruhet edhe në rast të një lirimi të mundshëm me kusht, duke argumentuar se Thaçi nuk ka pasur synime për të penguar drejtësinë as gjatë qëndrimit në qendrën e paraburgimit.
Ky zhvillim vjen në një kohë kur palët janë në pritje të aktgjykimit të shkallës së parë, i cili është caktuar të shpallet më 16 shtator.