Ushtruesja e detyrës së Presidentes, Albulena Haxhiu, ka deklaruar se familjarët e krerëve të Ushtrisë Çlirimtare të Kosovës, të cilët po përballen me procesin gjyqësor në Hagë, kanë refuzuar ftesën e saj për takim. Sipas Haxhiut, qëllimi i kësaj iniciative ishte që Presidenca, si institucioni më i lartë shtetëror, të shprehte mbështetjen institucionale për nevojat dhe kërkesat e këtyre familjeve në një moment të ndjeshëm.
“Arsyeja pse kam konsideruar që është e rëndësishme të takohem me familjarët është se vlerësoj që në situatën në të cilën jemi, po flas për institucionin e Presidencës, të takohet me familjarët dhe të shprehë mbështetjen tonë për kërkesat dhe nevojat e tyre. Ata nuk kanë dashur, e respektoj vendimin e tyre”, theksoi Haxhiu.
Ajo shtoi se mbetet e gatshme për të zhvilluar këtë takim në çdo moment që familjarët dëshirojnë, qoftë përmes pritjes në institucion, qoftë përmes vizitave në familjet e tyre. Haxhiu sqaroi se kishte zgjedhur t'i priste fillimisht në institucion për të përcjellë një mesazh zyrtar mbështetës.
Lidhur me situatën aktuale, ushtruesja e detyrës së Presidentes shprehu përkrahje të qartë për reagimin e qytetarëve dhe tubimet që po mbahen ditët e fundit në kundërshtim me vendimin e Gjykatës Speciale. “I mbështes protestat qytetare, do të shqetësohesha që pas vendimit në Hagë të mos kishte protesta. I përgëzoj qytetarët”, përfundoi ajo.