Ushtruesja e detyrës së presidentes së Kosovës, Albulena Haxhiu, mori pjesë në Mbrëmjen Gala të organizuar me rastin e njohjes së Agjencisë së Kosovës për Akreditim nga Këshilli për Akreditimin e Arsimit të Lartë në Shtetet e Bashkuara të Amerikës.
Haxhiu tha se njohja paraqet arritje të rëndësishme për arsimin e lartë në Kosovë. Sipas saj, kjo ngjarje jep besueshmëri punës akademike, forcon besimin në institucionet e vendit dhe e vendos Kosovën denjësisht në hartën ndërkombëtare të cilësisë në arsim.
Ajo theksoi se njohja është dëshmi se Agjencia ka hyrë në një rreth më të gjerë besueshmërie, ku cilësia vlerësohet nga partnerë ndërkombëtarë. Haxhiu shtoi se besimi i tyre tregon se Kosova po ndërton standarde të krahasueshme me botën demokratike dhe akademike.
Në fjalën e saj Haxhiu vlerësoi arsimin e lartë si një prej mënyrave më fisnike për përgatitjen e së ardhmes së vendit. Ajo theksoi se besimi në arsim mat seriozitetin e shtetit ndaj dijes, meritës dhe cilësisë.