Çështja hetimore për tjetërsimin e sipërfaqeve të mëdha të tokës bujqësore në zonën bregdetare të Vlorës ka kaluar në juridiksionin e Prokurorisë së Posaçme (SPAK). Ky institucion ka regjistruar procedimin penal pas kallëzimeve të banorëve të zonave të Orikumit, Rradhimës dhe Dukatit.
Sipas hetimeve, tokat dyshohet se janë tjetërsuar përmes falsifikimit të dokumenteve dhe më pas janë regjistruar në hipotekë, duke dëmtuar pronarët që i kishin përfituar ato në bazë të ligjit 7501. Si rrjedhojë, SPAK ka kërkuar nga prokuroria vendore të gjitha aktet dhe provat e administruara gjatë fazës paraprake.
Në kuadër të veprimeve procedurale, agjentët e SPAK-ut dhe prokurorë të Vlorës kanë zhvilluar kontrolle në disa banesa në qytet, si dhe në mjediset e Hipotekës së Vlorës. Kallëzuesit kanë kërkuar hetimin e zyrtarëve dhe individëve të përfshirë për veprat penale të “Shpërdorimit të detyrës”, “Falsifikimit të dokumenteve” dhe dyshime për veprimtari në kuadër të një “Grupit të strukturuar kriminal”.