Hetimet për vrasjen e gjyqtarit të Apelit të Juridiksionit të Përgjithshëm, Astrit Kalaja, mbeten në vendnumëro për shkak të mungesës së rezultateve nga ekspertiza teknike e celularëve. Gjyqtari Kalaja u qëllua për vdekje me 3 plumba brenda sallës së gjyqit më 6 tetor 2025, menjëherë pasi shpalli një vendim në një çështje pronësie që përfshinte familjen Shkambi në Shkodër.
I dyshuari kryesor, Elvis Shkambi, u vetëdorëzua në polici menjëherë pas ngjarjes, ndërsa më vonë u arrestua edhe xhaxhai i tij, Gjon Shkambi. Prokuroria dyshon se Gjon Shkambi mund të ketë pasur rol bashkëpunues ose nxitës në ekzekutimin e gjyqtarit, pretendime të cilat ai i ka mohuar kategorikisht duke deklaruar se nuk ka pasur dijeni për veprimet e nipit të tij.
Në muajin prill, organi i akuzës vendosi zgjatjen e hetimeve me 3 muaj për të administruar aktekspertimet e celularëve të sekuestruar. Ndërsa ekspertiza për celularin e Gjon Shkambit ka përfunduar, prokurorët mbeten në pritje të përfundimeve për telefonin e Elvis Shkambit. Hetuesit synojnë që, përmes analizimit të komunikimeve mes tyre dhe me persona të tretë, të provojnë nëse ekzekutimi ka qenë një ngjarje e organizuar paraprakisht nga dyshja.