Elvis Shkëmbi dhe xhaxhai i tij Gjon Shkëmbi janë nën hetim për vrasje të funksionarit të drejtësisë në bashkëpunim. Prokuroria ka kërkuar zbërthimin e komunikimeve në telefonat e tyre, të sekuestruar në ditën e krimit në sallën e gjykimit në Tiranë.
Sipas burimeve të Top Channel, dy prokurorët e çështjes kanë kërkuar kodet e telefonave nga Elvis Shkëmbi, 30-vjeçar, dhe xhaxhai i tij, por asnjëri nuk i ka vendosur në dispozicion. Prandaj, është kërkuar ekspertizë nga policia shkencore për të shqyrtuar bisedat mes nipit, xhaxhait dhe personave të tjerë. Kjo synon të vërtetojë nëse Gjon Shkëmbi kishte rol shtytës ose bashkëpunues gjatë udhëtimit drejt Tiranës për procesin civil mbi pronësinë.
Ngjarja ndodhi në një seancë gjyqi ku Astrit Kalaja, gjyqtar i apelit, shpalli vendim kundër palës së Shkëmbijve. Elvis Shkëmbi qëlloi për vdekje gjyqtarin dhe plagosi dy të tjerë, palë në proces. Provat tregojnë se ai kishte hyrë i armatosur edhe në seanca të mëparshme pa u vënë re.
Elvis Shkëmbi nuk ka ankuar për masën e sigurisë. Ai ka dëshmuar se ndjeu urrejtje për vendimin e konsideruar të padrejtë dhe se ishte ankuar për proceset e tejzgjatura pranë Inspektoriatit të Lartë të Drejtësisë dhe institucioneve të tjera.
Gjon Shkëmbi, i arrestuar që nga 6 tetori, kërkon lirinë duke pretenduar se nuk dinte për planet e nipit. Ai shprehet se pas vrasjes i tha nipit: "Na fike". Kërkesa e tij e fundit për liri u shty për 27 janar.
Vrasja ka ngritur çështjen e sigurisë në gjykata dhe prokurori.