Banorët e qytetit të Krushevës kanë rifituar mundësinë për të përdorur ujin e ujësjellësit për pije dhe nevoja shtëpiake, pas një jave kufizime. Vendimi për rikthimin e ujit në përdorim u mor pasi Qendra për Shëndet Publik në Prilep kreu tri analiza laboratorike radhazi, të cilat rezultuan të pastra si nga aspekti bakteriologjik, ashtu edhe nga ai kimik.
Sipas Petar Ohanesian, udhëheqës i Departamentit të Higjienës në Qendrën për Shëndet Publik – Prilep, mostrat e marra në datat 22, 23 dhe 24 korrik dëshmuan se uji përmban nivele të klorit rezidual brenda kufijve të lejuar dhe është i sigurt për konsum njerëzor. Këto rezultate iu përcollën Agjencisë së Ushqimit dhe Veterinarisë, e cila pas inspektimit përfundimtar, vendosi shfuqizimin e ndalesës së mëparshme.
Kufizimi i përdorimit të ujit ishte vendosur më 23 korrik, pas identifikimit të baktereve fekale gjatë një kontrolli rutinë. Autoritetet shëndetësore njoftuan se situata epidemiologjike në qytet mbetet e qëndrueshme dhe nuk është raportuar për rritje të numrit të qytetarëve që paraqiten me sëmundje të zorrëve.
Ndërkohë, autoritetet kanë lëshuar një paralajmërim për qytetarët dhe vizitorët lidhur me burimet e ujit jashtë qytetit. Sipas testimeve të fundit, çezmat publike të vendosura përgjatë rrugës për në Krushevë vazhdojnë të shfaqin ndotje bakteriologjike. Për rrjedhojë, uji nga këto çezma nuk rekomandohet për përdorim, pavarësisht normalizimit të situatës në rrjetin e ujësjellësit të qytetit.