Drejtori i Përgjithshëm i Policisë së Shtetit, Skënder Hita, ka kritikuar ashpër performancën e forcave të rendit gjatë protestës së zhvilluar më 30 maj në Zvërnec. Në një konferencë për mediat, Hita deklaroi se policia u shfaq e fjetur dhe joprofesionale, pasi nuk ndërhyri për të parandaluar dhunimin e një qytetari nga rojet e sigurisë private të një kantieri.
Sipas Hitës, shkarkimi i ish-drejtorit të Policisë së Vlorës, Elidon Çela, erdhi për shkak të dështimit në menaxhimin e tubimit, si dhe për shkak të informacionit të pavërtetë që u përçua publikisht lidhur me incidentin. Për këtë ngjarje, është ngritur një grup i posaçëm hetimor, ndërsa Drejtoria e Standardeve Profesionale ka nisur një hetim të thelluar disiplinor për gjithë zinxhirin komandues të policisë vendore.
Krahas masave ndaj strukturave policore, Hita njoftoi heqjen e licencave për dy shoqëri private të sigurimit fizik, të cilat ishin të angazhuara për ruajtjen e pronës në zonën ku u zhvillua protesta:
- Myrto Security 1.3A
- Major Security
Kreu i Policisë së Shtetit theksoi se Edvin Ndreu, drejtori i ri i komanduar i Policisë së Vlorës, do të ketë për detyrë riorganizimin dhe forcimin e strukturave për të rikthyer besimin e qytetarëve. Ai shtoi se asnjë shkelje e ligjit nuk do të tolerohet dhe se hetimet nga Agjencia e Mbikëqyrjes Policore (AMP) dhe prokuroria po vijojnë.