Përzgjedhësi i Egjiptit, Hossam Hassan, ka sqaruar domethënien e gjestit me duar në formën e shkronjës “X”, të cilin e bëri gjatë humbjes 3-2 ndaj Argjentinës në 1/8 e finales së Kupës së Botës. Veprimi i tij në minutën e 98-të, kur iu drejtua arbitrit Francois Letexier, ngjalli reagime të shumta, pasi ky gjest në futboll përdoret shpesh për të raportuar incidente raciste.
Në një deklaratë për "The Sun", Hassan ka mohuar kategorikisht çdo lidhje me këtë fenomen. "Ai gjest nuk kishte të bënte me racizmin. Po i thosha gjyqtarit: 'Nuk po tregon drejtësi'", u shpreh trajneri egjiptian. Skuadra e Egjiptit kishte krijuar një avantazh prej 2-0, por Argjentina përmbysi rezultatin me golat e Cristian Romeros, Lionel Messit dhe Enzo Fernandezit.
Egjiptianët shprehën pakënaqësi të theksuar ndaj vendimeve të gjyqtarit, veçanërisht pas anulimit të golit të Mostafa Zikos dhe pretendimeve për një faull ndaj Mohamed Salah në aksionin para golit të fitores së argjentinasve në minutën e 93-të.
Lidhur me përballjen me Lionel Messin, trajneri egjiptian tregoi se ylli argjentinas iu afrua menjëherë për të kërkuar shpjegime. "Messi erdhi tek unë dhe më tha: 'Pse? Pse?' Ishte një nga rastet e rralla kur Messi u përfshi në debate gjatë një ndeshjeje. Në fund ai përfundoi duke qarë, sepse po e përjetonte emocionalisht atë që po ndodhte. Ne ishim një ekip shumë i fortë dhe i vumë në vështirësi", rrëfeu Hassan. Ai shtoi se vendosi të mos përfshihej në debat verbal me argjentinasin, nga respekti për karrierën e tij.