Ministri për Evropën dhe Punët e Jashtme, Ferit Hoxha, së bashku me Kryeministrin Edi Rama, morën pjesë në një dialog të hapur me 150 aktivistë të rinj nga Shqipëria, Maqedonia e Veriut dhe Mali i Zi, në kuadër të aktivitetit RinCamp2026. Takimi, i zhvilluar në një panel të organizuar nga Agjencia Kombëtare e Rinisë, u përqendrua te procesi i integrimit evropian dhe progresi i vendit.
Gjatë fjalës së tij, ministri Hoxha theksoi se procesi i anëtarësimit në Bashkimin Evropian kërkon përfshirjen aktive të të gjithëve, veçanërisht të të rinjve, të cilët i cilësoi si përfituesit kryesorë të investimeve aktuale.
"Ky është qëllimi ynë kombëtar, misioni ynë i përbashkët dhe mundësia më e mirë e të rinjve. Ky brez do të jetë i pari që do ta përjetojë Shqipërinë si shtet anëtar i Bashkimit Evropian. Në Bruksel merren vendimet, por reformat bëhen këtu. Evropa fillon në shtëpi", u shpreh ministri Hoxha.
Sipas tij, ndërsa qeveria mban përgjegjësinë për të udhëhequr procesin drejt anëtarësimit, detyra e të rinjve do të jetë përfaqësimi dhe mbrojtja e interesave të Shqipërisë brenda familjes evropiane, si dhe mbrojtja e interesave të përbashkëta në skenën globale.