Enver Hoxhaj, deputet i PDK-së dhe ish-ministër i Punëve të Jashtme, komentoi dialogun Kosovë-Serbi në emisionin "Këndi i Debatit" në T7.
Ai tha se dialogu ka hyrë në një fazë të rrezikshme, ku po bëhen kompromise të brendshme dhe marrëveshje të dëmshme. Sipas Hoxhajt, mungon transparenca nga Qeveria për zhvillimet në këtë proces.
Hoxhaj theksoi se Albin Kurti nuk e trajton dialogun si interes nacional. "Duhet ta diskutojmë se cilat janë përfitimet e Kosovës. Po shohim produkte, marrëveshje që janë të dëmshme", u shpreh ai.
Duke iu referuar Ligjit për të huajt, Hoxhaj pyeti nëse ky ligj ka të bëjë me zbatim të ligjit apo me zbatim të Asociacionit të Komunave me Shumicë Serbe. Ai vlerësoi se, po të funksiononte Kuvendi i Kosovës, kjo çështje do të duhej të debatohej.
Hoxhaj propozoi që Kuvendi të sjellë një rezolutë të re rreth asaj se çka sjell dialogu Kosovë-Serbi në vitin 2026. Ai komentoi deklaratën e Kurtit se nuk e ka bërë Asociacionin, duke thënë se, nëse Kurti e sjell në Kuvend për ta zhbërë draft-statutin që e ka pranuar, PDK do t’i japë nënshkrimet.
Sipas tij, Kurti synon të ikë kontrollit demokratik të brendshëm dhe temës së dialogut. Kjo, sipas Hoxhajt, përputhet me situatën e Ligjit për të huajt.