Deputeti i Lidhjes Demokratike të Kosovës (LDK), Avdullah Hoti, ka reaguar ndaj vendimit të fundit të Qeverisë së Kosovës për të lejuar regjistrimin e fakteve civile përmes dokumenteve të lëshuara nga strukturave ilegale serbe. Ky vendim lidhet me pajtimin me Bashkimin Evropian për gjetjen e një modaliteti që shtyn zbatimin strikt të Ligjit për të Huajt.
Në një postim në Facebook më 14 mars 2026, Hoti akuzoi kryeministrin Albin Kurti se në fillim të mandatit të tij në 2021 braktisi dialogun për njohje reciproke dhe marrëveshje gjithëpërfshirëse përfundimtare ligjërisht të obligueshme me Serbinë. Ai theksoi se në atë kohë ekzistonte një dakordim i përgjithshëm me aleatët ndërkombëtarë që dialogu të zhvillohej vetëm për një marrëveshje të tillë, në të cilën do të adresoheshin të gjitha çështjet e mbetura nga dialogu teknik, duke u mbështetur në normat dhe standardet ndërkombëtare të normalizimit të bashkëpunimit ndërshtetëror. Liderët evropianë dhe amerikanë kishin shprehur mbështetje për një qasje të tillë.
Hoti vuri në dukje se, pas disa vitesh sanksionesh nga BE-ja dhe kritikash nga aleatët e tjerë, Kurti tani detyrohet të merret me normalizimin e funksionimit të strukturave paralele. Ai deklaroi se Kosova duhet të jetë e gatshme për dialog me Serbinë, gjithmonë me ndërmjetësimin e aleatëve, por askush nuk ka të drejtë të pranojë zgjidhje teknike që legjitimojnë këto struktura apo vendosin një status quo të papranueshëm.