Deputeti i Partisë Demokratike të Kosovës (PDK), Enver Hoxhaj, ka reaguar lidhur me mospërfshirjen e Kosovës në Samitin e NATO-s që do të mbahet javën e ardhshme në Ankara. Sipas Hoxhajt, pjesëmarrja në këto takime është e një rëndësie strategjike për forcimin e pozitës ndërkombëtare të shtetit.
Hoxhaj argumentoi se vendimi i Aleancës për të ftuar 10 shtete që nuk gëzojnë partneritet formal, nuk janë pjesë e programit Partneriteti për Paqe (PfP) dhe nuk janë në proces anëtarësimi, dëshmon se ekzistojnë mundësi diplomatike për përfshirjen e partnerëve. Sipas tij, kur ekziston vullneti politik, partnerët mund të përfshihen përmes ftesave nga vendi nikoqir, vetë Aleanca ose shtetet anëtare.
"Kur mungon në ato tavolina, mungon edhe mundësia për ta forcuar pozitën ndërkombëtare të shtetit", deklaroi Hoxhaj, duke shtuar se diplomacia duhet të punojë vazhdimisht për praninë në mekanizmat ku merren vendimet.
Nga ana tjetër, Ministria e Punëve të Jashtme ka konfirmuar pozicionin zyrtar, duke sqaruar se Kosova nuk merr pjesë në samitet e NATO-s pasi nuk është anëtare e Aleancës dhe nuk bën pjesë në programin Partneriteti për Paqe (PfP).