Ish-ministrja e Punëve të Jashtme, Meliza Haradinaj, ka kritikuar mungesën e përfaqësimit të Kosovës në aktivitetet politike të samitit të NATO-s, duke e cilësuar këtë si pasojë të një deficiti diplomatik dhe jo të statusit të vendit.
Kjo deklaratë vjen si reagim ndaj qëndrimit zyrtar të Ministrisë së Punëve të Jashtme dhe Diasporës, e cila argumentoi se Kosova nuk ftohet në samite për shkak se nuk është anëtare e Aleancës dhe nuk është pjesë e programit Partneriteti për Paqe.
Haradinaj kundërshtoi këtë shpjegim, duke kujtuar se në vitin 2024, presidentja Vjosa Osmani mori pjesë në aktivitetet e samitit në Uashington me ftesë të sekretarit amerikan të shtetit dhe të presidentit të SHBA-së. Sipas saj, pjesëmarrja e Osmanit në atë kohë vërteton se prania në samit nuk kushtëzohet vetëm nga kriteret formale të anëtarësisë.
“Në vitin 2024, presidentja e Kosovës u rreshtua krahas krerëve të shteteve anëtare të NATO-s si e ftuar e posaçme e presidentit amerikan”, theksoi Haradinaj. Ajo vlerësoi se udhëheqësit e shtetit duhet të angazhohen për të ndërtuar marrëdhënie më të forta me aleatët, në mënyrë që Kosova të jetë e pranishme në forumet ku vendosen çështjet strategjike të sigurisë dhe politikës ndërkombëtare.