Institucionet e Republikës së Kosovës nuk kanë marrë ftesë për të marrë pjesë në samitin e nivelit të lartë të NATO-s, që do të zhvillohet më 7 dhe 8 korrik 2026 në Ankara të Turqisë. Edhe pse Aleanca ka konfirmuar pjesëmarrjen e 32 shteteve anëtare dhe 10 vendeve të tjera jo-anëtare, Kosova nuk figuron në listën e pjesëmarrësve.
Ministria e Mbrojtjes ka dalë me një sqarim zyrtar, duke theksuar se Kosova nuk është anëtare e Aleancës dhe as pjesë e Programit të Partneritetit për Paqe (PfP), prandaj nuk merr pjesë në samite si shtet pjesëmarrës. Sipas këtij institucioni, takimet e këtij niveli janë të rezervuara për krerët e shteteve dhe qeverive të vendeve anëtare, si dhe për partnerët e ftuar në raste të veçanta.
Sipas Ministrisë së Mbrojtjes, përjashtimet e vetme në të kaluarën kanë qenë disa aktivitete në margjinat e samiteve, siç ishte nisma "Gratë, Paqja dhe Siguria" (Women, Peace and Security), e organizuar nga Departamenti i Shtetit i Shteteve të Bashkuara të Amerikës gjatë vitit të kaluar.
Autoritetet në Prishtinë kanë bërë me dije se Republika e Kosovës mbetet e përkushtuar në rrugën e saj drejt anëtarësimit të plotë, duke vazhduar me zbatimin e reformave dhe bashkëpunimin me shtetet anëtare të NATO-s.
Përditësime
Ministria e Punëve të Jashtme dhe Diasporës (MPJD) ka sqaruar se pjesëmarrja e mëparshme e Kosovës në nismën 'Women, Peace and Security' nuk ka qenë pjesë e samitit të NATO-s, por një ngjarje anësore në margjina të tij. Institucioni ka konfirmuar se në samitin e radhës do të marrin pjesë vetëm partnerët e NATO-s nga grupi Indo-Pacific Four (Japonia, Koreja e Jugut, Australia dhe Zelanda e Re) si dhe Ukraina.