Ish-ministri i jashtëm dhe deputeti i Kuvendit të Kosovës, Enver Hoxhaj, reagoi për zhvillimet e fundit në Iran. Në një video të publikuar në rrjete sociale, ai i cilësoi sulmet e partnerëve amerikanë ndaj regjimit iranian dhe vrasjen e Ali Khamenei si një moment me rëndësi globale, me implikime të drejtpërdrejta për Kosovën.
Hoxhaj e përshkroi regjimin iranian si armiqësor ndaj Kosovës. Ai theksoi se ky regjim nuk e njohu pavarësinë e Kosovës dhe pengoi vende të tjera për ta bërë një gjë të tillë. "Sulmet e partnerëve amerikanë ndaj regjimit të Iranit dhe vrasja e Khamenei janë një lajm i madh dhe i rëndësishëm për botën. Ky është një regjim kriminal i cili çdo ditë vret dhe masakron popullin e tij. Së pari, ka qëndruar mbrapa shumë sulmeve terroriste në Amerikë, në Evropë dhe kudo në botë. Së dyti, duke qenë një aleat i Rusisë por edhe i Serbisë ka kundërshtuar historikisht Kosovën e lirë dhe të pavarur. Jo vetëm që ky regjim nuk e njohu pavarësinë e Kosovës, por bllokoi edhe shumë vende që ta marrin një vendim pozitiv dhe ta njohin Kosovën", tha Hoxhaj.
Sipas deputetit, një ndryshim i regjimit në Iran do të sillte demokratizim të brendshëm dhe riorientim të politikës së jashtme drejt vendeve perëndimore. Kjo do të çonte në njohjen e shteteve që aktualisht nuk i njeh, përfshirë Kosovën. "Ndër efektet e para të një Irani demokratik do të ishte një politikë e jashtme demokratike dhe njohja e Kosovës, ngjashëm sikurse ka ndodhur pas largimit të Assadit në Siri", u shpreh Hoxhaj.