Enver Hoxhaj, ish-ministër i Punëve të Jashtme të Kosovës, deklaroi se ngjarjet në Iran përbëjnë kryengritjen më të madhe politike në dy dekadat e fundit dhe një momentum historik për ndryshim politik jo vetëm për iranianët, por për të gjithë Lindjen e Mesme.
Hoxhaj e vlerësoi situatën bazuar në kontaktet e tij të drejtpërdrejta me diasporën iraniane. “E them këtë si dikush i cili ka pasur mundësi të jetë në kontakt me shumë iranianë të cilët jetojnë në diasporë dhe të cilët kohët e fundit janë më se të vendosur dhe të organizuar që ta mbështesin ndryshimin politik në Iran”, tha ai.
Sipas tij, ndryshimi politik është i mundur nëse protestat vazhdojnë dhe shndërrohen në betejë institucionale. “Jam më se i bindur që nëse populli i Iranit do të qëndron në rrugë, do t’i marrin institucionet, do ta bëjnë betejën e tij politike, mund të përmbyllet ndryshimi politik”, deklaroi Hoxhaj.
Ai theksoi se kjo ndodh në një kohë kur Irani po humb ndikimin rajonal. “Nëse kemi parasysh edhe humbjen e ndikimit që ka Irani në rajon, një humbje e ndikimit dhe një rënie e fuqisë iraniane në rajon, e cila ka pësuar ndryshim radikal në këto dy vitet e fundit”, shtoi ai.
Hoxhaj e cilësoi situatën si moment vendimtar historik për Iranin dhe Lindjen e Mesme, duke vënë në dukje se një rikonfigurim politik do të ishte në interes të shqiptarëve në Shqipëri dhe Kosovë. “Një rikonfigurim politik i cili do të ishte në interes jo vetëm të popujve që jetojnë atje, por edhe të shqiptarëve, edhe juve në Shqipëri dhe neve në Kosovë”, tha ai.
Ai kritikoi administratat e kaluara për përpjekje zgjidhjesh politike më shumë në interes të një balance gjeopolitike, sesa të ndryshimit të brendshëm.