Një shtetas i identifikuar si F.B., rreth 33 vjeç, ka humbur jetën si pasojë e plagëve të marra pas një aksidenti në fshatin Leshan të komunës së Suharekës. Ngjarja u raportua në polici rreth orës 20:30 të së enjtes, pasi viktima ishte transportuar për ndihmë mjekësore me autoambulancë nga shtëpia e tij.
Sipas njoftimit të zëdhënësit të Policisë së Kosovës për rajonin e Prizrenit, Shaqir Bytyqi, i lënduari kishte rënë nga një pemë qershie nga një lartësi prej 5-6 metrash. Viktima u dërgua fillimisht në Spitalin Rajonal të Prizrenit, ndërsa më pas u transferua në Qendrën Klinike Universitare të Kosovës (QKUK) në Prishtinë. Pavarësisht përpjekjeve të personelit mjekësor, ai nuk ka arritur t'u mbijetojë lëndimeve.
Në vendin e ngjarjes dhe në institucionet shëndetësore kanë dalë njësitë policore dhe hetuesit, të cilët në bashkëpunim me Prokurorin e Shtetit kanë iniciuar rastin si "Hetim i vdekjes". Me urdhër të prokurorisë, trupi i pajetë është dërguar në Institutin e Mjekësisë Ligjore në Prishtinë për kryerjen e obduksionit, në mënyrë që të zbardhen rrethanat e plota të ngjarjes.