Ngjarja e rëndë është regjistruar më 21 korrik 2026, kur një foshnjë 7-muajshe ka ndërruar jetë gjatë transportimit për në spitalin rajonal "Omer Nishani" në Gjirokastër. Fëmija, i cili kishte shfaqur temperaturë prej 38.5°C për tre ditë, ishte nisur drejt Qendrës Shëndetësore të Memaliajt, por ka mbërritur atje pa shenja jete.
Sipas hetimeve paraprake, foshnja kishte marrë mjekim në spitalin e Gjirokastrës rreth 12 ditë para ngjarjes, por gjendja e saj nuk kishte treguar përmirësim. Grupi hetimor po verifikon nëse shërbimi mjekësor i ofruar gjatë dy vizitave të kryera përgjatë muajit korrik ka qenë i përshtatshëm dhe në përputhje me gjendjen shëndetësore të pacientit.
Policia e Gjirokastrës ka referuar materialet në Prokurori dhe ka proceduar dy mjekët pediatër, Mikel Koti dhe Edmond Kotoni. Në kuadër të hetimeve, autoritetet kanë sekuestruar kartelën mjekësore të foshnjës për të zbardhur rrethanat e plota dhe për të përcaktuar përgjegjësitë e mundshme lidhur me këtë rast tragjik.