Një foshnje 2-muajshe nga Korça ka ndërruar jetë në Qendrën Spitalore Universitare Nënë Tereza (QSUT) në Tiranë. Ajo u dërgua me urgjencë më 13 mars nga Spitali Rajonal i Korçës për mjekim më të specializuar, për shkak të gjendjes së rëndë shëndetësore. Foshnja mbërriti me probleme të theksuara respiratore dhe parametrat jetësorë në kufijtë minimalë, ndërsa vdiq disa orë pas mbërritjes, pavarësisht ndërhyrjes së mjekëve.
Foshnja kishte lindur parakohe rreth dy muaj më parë, kur nëna ishte në muajin e shtatë të shtatzënisë. Nga ekzaminimet rezultoi se peshoja vetëm 1 kilogram, e njëjtë me peshën në lindje, çka tregon mungesë zhvillimi dhe ushqyerje të pamjaftueshme. Mësohet se nëna e ushqente kryesisht me çaj.
Akuzat e nënës
Nëna Vjollca Shkëmbi akuzon mjekët e QSUT-së në Tiranë dhe të Korçës për lirim të parakohshëm të foshnjës nga spitali. Ajo deklaroi për Euronews Albania se kjo qe shkaku i vdekjes, pasi fëmija "as nuk hante e as nuk pinte". Vjollca Shkëmbi kërkon nga shteti dhe policia të marrin masa ndaj mjekëve të të dy qyteteve, duke thënë se doktorët e Korçës kishin premtuar mbajtje 10 ditësh, por e lanë ditën e dytë.
Hetimet
Grupi hetimor ka dërguar materialet në Prokurorinë e Korçës. Hetimet do të verifikojnë nëse shkaku i vdekjes është kequshqyerja apo ndonjë problem tjetër shëndetësor që foshnja mund të ketë pasur që nga lindja, duke përfshirë lindjen e parakohshme. Burime bëjnë të ditur dyshime për probleme shëndeti mendor të nënës, e cila dje kërkonte ta merrte fëmijën në shtëpi. Hetimet vijojnë për analizën e dokumentacionit mjekësor dhe faktorëve të tjerë.