Hungaria i ka dhënë azil politik ish-ministrit polak të Drejtësisë, Zbigniew Ziobro, i cili akuzohet për një sërë veprash penale të lidhura me shpërdorimin e fondeve publike dhe përdorimin e paligjshëm të mjeteve të përgjimit. Ngjarja u bë e ditur më 12 janar 2026, ndërsa Ziobro, deputet i partisë konservatore Ligji dhe Drejtësia, dyshohet për kryerjen e 26 veprave penale gjatë periudhës 2015–2023, kur drejtonte Ministrinë e Drejtësisë.
Akuzat lidhen me keqpërdorimin e fondeve të Fondit të Drejtësisë, i krijuar për ndihmën e viktimave të krimit dhe rehabilitimin e të dënuarve. Sipas hetimeve, një pjesë e këtyre fondeve dyshohet se u përdor për blerjen e programit izraelit të përgjimit Pegasus, me vlerë rreth 25 milionë zloty. Ky program, sipas autoriteteve polake aktuale dhe një grupi hetimor të Parlamentit Europian, u përdor për të hyrë fshehurazi në telefonat e kundërshtarëve politikë.
Në një reagim në rrjetin social X, Ziobro deklaroi se ka pranuar azilin në Hungari për shkak të asaj që ai e quan represion politik në Poloni. Ai akuzoi kryeministrin polak Donald Tusk për hakmarrje personale dhe foli për një rrëshqitje drejt diktaturës. Nëse shpallet fajtor, Ziobro mund të përballet me deri në 25 vite burg. Më 15 janar, një gjykatë në Varshavë pritet të shqyrtojë kërkesën e prokurorisë për arrestimin e tij dhe vendosjen e masës së paraburgimit.
Gjatë mandatit të tij, Ziobro ishte arkitekti kryesor i reformës së sistemit gjyqësor në Poloni, e cila u kritikua ashpër nga Komisioni Europian dhe organizata ndërkombëtare për minimin e pavarësisë së gjyqësorit. Në dhjetor 2024, qeveria hungareze e kryeministrit Viktor Orbán i dha azil politik edhe ish-zëvendësministrit Marcin Romanoëski, bashkëpunëtor i afërt i Ziobro-s, i cili përballet me akuza të ngjashme. Ziobro i mohon akuzat dhe pretendon se nuk do të marrë një gjykim të drejtë në Poloni.
Përditësime
Péter Szijjártó, ministri i Jashtëm hungarez, konfirmoi se Hungaria i ka dhënë azil politik ish-ministrit të Drejtësisë polak Zbigniew Ziobro dhe disa personave të tjerë që përballen me persekutim politik në Poloni.
Avokati i tij, Bartosz Lewandowski, deklaroi se klienti nuk do të kishte një gjykim të drejtë në Poloni.
Parlamenti polak i hoqi imunitetin parlamentar Ziobro-s në nëntor.