Qeveria e Hungarisë ka publikuar një dekret të ri që kufizon hyrjen e punëtorëve nga vendet që nuk janë anëtare të Bashkimit Evropian. Ky vendim është ndërmarrë për të përmbushur një prej premtimeve zgjedhore të kryeministrit Peter Magyar.
Sipas të dhënave zyrtare, në Hungari janë të angazhuar rreth 90 mijë shtetas të huaj, të cilët punojnë kryesisht në industrinë e baterive, sektorin e automobilave, ndërtimtari, bujqësi dhe shërbimet e shpërndarjes. Këta punëtorë vijnë kryesisht nga Filipinet, Ukraina, Kina, Vietnami dhe India.
Kryeministri Magyar e ka arsyetuar këtë ndryshim ligjor me synimin për të rritur punësimin e qytetarëve hungarezë dhe për të frenuar politikat e kompanive që shfrytëzojnë fuqinë punëtore të huaj për uljen e pagave. Nga ana tjetër, shoqatat e industrisë dhe punëdhënësve kanë shprehur shqetësimin në lidhje me këtë vendim, duke theksuar se tregu hungarez vazhdon të përballet me mungesë të theksuar të krahut të punës në sektorë të ndryshëm.
Rregullorja e re saktëson se lejet ekzistuese të qëndrimit do të mbeten të vlefshme deri në skadimin e tyre, ndërsa mbetet e paqartë nëse ato do të mund të rinovohen pas përfundimit të afateve aktuale.