Deputetja e Lidhjes Demokratike të Kosovës (LDK), Hykmete Bajrami, ka bërë thirrje për mbylljen e deponisë së Sferkës, si dhe për një hetim të thelluar mbi vonesat e reagimit institucional ndaj zjarrit që përfshiu këtë zonë. Ajo shprehu kritika për faktin se institucionet ndërhynë vetëm pas 10 ditësh djegie të pandërprerë, periudhë gjatë së cilës qytetarët ishin të ekspozuar ndaj tymit.
Bajrami ka mirëpritur angazhimin e Forcës së Sigurisë së Kosovës (FSK) dhe urdhrin e komandantit të saj, gjenerallejtënant Bashkim Jashari, për shuarjen e zjarrit. Megjithatë, deputetja theksoi se vonesa në këtë reagim ka shkaktuar dëme serioze për shëndetin e banorëve, mjedisin dhe pronën private.
Lidhur me këtë situatë, Bajrami njoftoi se i qëndron prapa kallëzimit penal që ka dorëzuar më parë, duke kërkuar nga organet e drejtësisë të identifikojnë të gjithë personat përgjegjës për mosveprim. Sipas saj, institucionet duhet të japin llogari për vonesën në aktivizimin e kapaciteteve shtetërore, duke shtuar se deponia e Sferkës duhet të mbyllet përfundimisht.