Ministri në detyrë i Infrastrukturës dhe Transportit, Dimal Basha, njoftoi nënshkrimin e Udhëzimit Administrativ për ndryshimin dhe plotësimin e Udhëzimit Administrativ (MMPHI) nr. 15/2024. Ky akt ligjor rregullon lëshimin e Certifikatës së Kompetencës Profesionale (CKP) për shoferët e kamionëve dhe autobusëve që operojnë në transportin ndërkombëtar.
Sipas njoftimit zyrtar, udhëzimi hyn në fuqi më 9 qershor. Vendimi pason ankesat e shumta të shoferëve dhe operatorëve të transportit mbi boshllëqet ligjore, të cilat kishin shkaktuar vështirësi gjatë operimit dhe gjoba të shpeshta në kalimet kufitare.
Ministri Basha deklaroi se, pas marrjes së detyrës, angazhoi një grup punues për hartimin e këtij udhëzimi me përparësi. Me zbatimin e rregullores së re, pritet të zhbllokohet procesi i certifikimit për shoferët fillestarë, duke eliminuar pengesat e kahmotshme në transportin ndërkombëtar.