Një 17-vjeçar me inicialet S. Z., banues në qytetin e Bajram Currit, Tropojë, rezulton i humbur që nga 14 janari. Familjarët e tij kanë kallëzuar largimin e tij nga banesa në Komisariatin Tropojë dhe kërkojnë ndihmë për gjetjen e tij.
Sipas njoftimit të policisë vendore, familjarët kanë paraqitur kallëzimin më 14 janar për shtetasin S. Z., 17 vjeç. "Më datë 14 janar kanë kallëzuar familjarët e shtetasit S. Z., 17 vjeç, banues në qytetin e Bajram Currit, për largimin e tij nga banesa. Po punohet për gjetjen e tij", thuhet në deklaratën zyrtare.
Materialet procedurale iu referuan Prokurorisë për veprime të mëtejshme. Gjeneralitetet dhe fotografia e të miturit janë shpërndarë në të gjitha pikat kufitare dhe komisariatet për lehtësimin e kërkimeve.
Autoritetet po kryejnë përpjekje për gjeolokimin e tij përmes telefonit, si dhe formave të tjera të komunikimit, përfshirë rrjetet sociale. Nuk jepen detaje për rrethanat e largimit.