Ministrja e Ekonomisë dhe Inovacionit, Delina Ibrahimaj, së bashku me kryeministrin Edi Rama, prezantuan të martën drejtorin e ri të Agjencisë Kombëtare të Shoqërisë së Informacionit (AKSHI), Igli Tafa.
Në fjalën e saj, ministrja Ibrahimaj vuri theksin te roli strategjik i AKSHI-së në transformimin digjital të vendit. Ajo vlerësoi punën e deritanishme të agjencisë, duke e cilësuar atë si shtyllën kryesore të qeverisjes elektronike në Shqipëri dhe një histori suksesi në ofrimin e shërbimeve publike online.
“AKSHI përfaqëson një nga institucionet më të rëndësishme për qeverisjen moderne. Arritjet në digjitalizimin e shërbimeve publike janë një krenari për vendin tonë dhe një dëshmi e kapaciteteve profesionale të stafit. Shqipëria sot renditet ndër vendet me nivel të avancuar të ofrimit të shërbimeve elektronike, falë një pune të qëndrueshme dhe vizioni afatgjatë”, u shpreh ministrja Ibrahimaj.
Prioritetet për vitin 2026
Ministrja theksoi se objektivat për vitin 2026 janë ambiciozë dhe kërkojnë vijimësi të ritmit të punës. Fokus i veçantë do të jetë zhvillimi i platformës e-Albania 2.0, me shtrirje të plotë edhe në pushtetin vendor, si dhe ofrimi i shërbimeve proaktive të bazuara në ngjarje jetësore për të reduktuar procedurat dhe lehtësuar aksesin për qytetarët dhe bizneset.
Një prioritet tjetër është modernizimi i portalit të prokurimeve publike për të rritur transparencën, efikasitetin dhe integritetin në menaxhimin e fondeve publike. Transformimi digjital, sipas saj, rrit cilësinë e shërbimeve, ul kostot administrative dhe forcon besimin e qytetarëve te institucionet.
Fjalët e drejtorit Tafa
Drejtori i ri Igli Tafa e cilësoi përgjegjësinë e tij të madhe dhe premtoi bashkëpunim me stafin për të realizuar vizionin e kryeministrit Edi Rama në digjitalizimin e shërbimeve. Ai theksoi se AKSHI është zemra e modernizmit digjital dhe hallka kryesore e bashkëpunimeve me sektorin publik dhe privat.
Tafa premtoi shërbime gjithnjë e më të qëndrueshme, zhvillimin e e-Albania 2.0 dhe avancimin e teknologjisë së inteligjencës artificiale për të bërë Shqipërinë lider përtej rajonit në digjitalizim dhe inteligjencë artificiale.