Në ditën e gjashtë të konfliktit midis SHBA-së, Izraelit dhe Iranit, burime diplomatike të kontaktuara nga gazetari Muhamed Veliu i Top Channel kanë zbuluar për herë të parë numrin e shqiptarëve rezidentë në Iran.
Janë identifikuar gjithsej 6 shqiptarë, dy prej të cilëve gra të martuara me shtetas iranianë. Asnjëri nuk ka kërkuar ndihmë nga autoritetet shqiptare për t’u larguar, veçanërisht nga Ambasada e Shqipërisë në Ankara, e cila është kujdestare për Iranin pas ndërprerjes së marrëdhënieve diplomatike në shtator 2022.
Ministria për Evropën dhe Punët e Jashtme, të mërkurën, ka këshilluar shtetasit shqiptarë rezidentë ose vizitorë në Iran që planifikojnë udhëtime drejt Shqipërisë përmes pikave kufitare tokësore Iran-Turqi, të vendosin menjëherë në komunikim me Ambasadën në Ankara.
Në kontekst të ngjashëm, disa ditë pas sulmit të SHBA-së ndaj Iranit në qershor 2025, autoritetet shqiptare ndihmuan në riatdhesimin e një familjeje shqiptare nga Irani.
Bëhet fjalë për një shqiptar të punësuar në seksionin e gjuhës shqipe në radioiraniane, që jetonte atje që nga viti 1995. Ai bashkë me bashkëshorten dhe tre fëmijët udhëtuan nga Irani në Turqi dhe më pas në Shqipëri.