Eni Kokomani, theolog shqiptar me origjinë nga Shijaku, rrëfeu në emisionin „Opinion“ të TV Klan përjetimet e tij në Iran, ku ka jetuar për 10 vite. Ai u konvertua në shia dhe studioi islam në atë vend. Pas studimeve, punoi si gazetar në Radio Televizionin Shtetëror Iranian, duke përkthyer lajme nga persishtja në shqip, e më pas kaloi në radio. Jetoi kryesisht në qytetin Kum, ku punoi në redaksinë e RTV-së shtetërore.
Konflikti i fundit e gjeti në Kum, kur u vra Ali Khamenei. Atje ndodhën 9 shpërthime të fuqishme shumë pranë vendbanimit të tij. Kokomani jetonte aty me familjen. Për t’u kthyer në Shqipëri, udhëtoi rrugë tokësore drejt kufirit me Turqinë.
Sipas tij, në Iran jetojnë afër 15 shqiptarë. Në Kum ndodheshin ai me familjen, një vajzë shqiptare e martuar me një iranian, si dhe një mik i ngushtë që u kthye më parë në Shqipëri. Për të tjerët nuk ka informacione të fundit.
Pas shpërthimeve, komunikimi u bë i vështirë: hyrja në internet kërkonte VPN, ndërsa telefonatat drejt Shqipërisë ishin të pamundura. Kokomani thekson se frika nga shpërthimet me raketa ekziston vazhdimisht dhe mungojnë të dhënat për situatën brenda vendit.
Sa i përket protestave të brendshme, ato nisën për shkak të inflacionit dhe më pas disa protestues masakruan policë. Në Iran ekzistojnë parti politike, të cilat nuk mund të ndryshojnë regjimin, por ofrojnë ide për përmirësime brenda tij.