Përfaqësuesi Kushtrim Gara ka njoftuar se procesi i identifikimit të mbetjeve mortore, pas pranimit të raporteve të para të analizave të ADN-së, ka rezultuar në konfirmimin e identitetit të tre personave. Viktimat e identifikuara janë Idriz Rrecaj, Salim Meziu dhe Adem Beqiri, të cilët bënin pjesë në grupin e të rrëmbyerve dhe të zhdukurve me dhunë.
Sipas Garës, rezultatet e para vijnë nga lokacioni i Jabukës, ku është gjetur një varr masiv. Nga ky vend janë dërguar për ekzaminim katër deri në gjashtë mostra. Në total, deri në këtë fazë të procesit, janë dërguar 29 mostra për analiza laboratorike, ndërsa procesi do të vijojë edhe me mbetjet e tjera mortore të gjetura në zona të ndryshme.
Ndërsa procesi i zhvarrimit vazhdon në lokacione të ndryshme, Gara theksoi se mostrat për analiza të mëtejshme do të dërgohen pasi të përfundojë plotësisht puna në secilin vend të përcaktuar. Autoritetet mbeten të gatshme të dërgojnë mostra shtesë nëse vlerësohet si e nevojshme për finalizimin e identifikimeve, duke u bazuar në vlerësimet teknike të deritanishme.