Fatih Birol, kreu i Agjencisë Ndërkombëtare të Energjisë (IEA), ka paralajmëruar se ndërprerjet në furnizimet me naftë nga Lindja e Mesme do të intensifikohen gjatë muajit prill dhe do të ndikojnë drejtpërdrejt në ekonominë evropiane. Ai e bëri këtë deklaratë në një podcast me Nikolai Tangen, kreun e fondit sovran norvegjez.
Mbyllja e Ngushticës së Hormuzit ka kufizuar furnizimet globale, ndërsa sulmet ndaj infrastrukturës energjetike dhe kufizimet detare kanë përkeqësuar situatën. Që nga fillimi i konfliktit SHBA-Izrael me Iranin, janë humbur më shumë se 12 milionë fuçi naftë. Humbjet në prill pritet të jenë dy herë më të larta se në mars, pasi furnizimet e marsit ishin kontrata të vjetra.
Ndikimi në Evropë dhe Azi
Efektet janë ndjerë fillimisht në vendet aziatike dhe pritet të shtrihen në Evropë në prill ose maj. Problemet kryesore lidhen me mungesën e karburantit për avionë dhe naftës, të domosdoshme për ekonomi dhe transport. Kjo do të reflektohet me rritje të inflacionit dhe ngadalësim të rritjes ekonomike në shumë vende. Gjithashtu ndikohet furnizimi me gaz natyror të lëngshëm (LNG).
Masa emergjente
Vendet anëtare të IEA po shqyrtojnë lirim të mëtejshëm të rezervave strategjike, pas marrëveshjes për 400 milionë fuçi naftë të liuara më parë. Birol e krahasoi situatën me krizat e naftës të viteve 1973 dhe 1979, si dhe me pasojat energjetike të luftës në Ukrainë në 2022. Rreth 40 objekte infrastrukturore në Lindjen e Mesme janë dëmtuar dhe do t’i duhen kohë për rikthim.