Një grup organizatash ndërkombëtare, në krye me Federatën Ndërkombëtare të Gazetarëve (IFJ), ka bërë thirrje për ndërhyrje urgjente në lidhje me përkeqësimin e lirisë së medias dhe hapësirës qytetare në Shqipëri. Ky reagim vjen në kuadër të mobilizimit qytetar të vazhdueshëm, të njohur si Revolucioni i Flamingove, ku gazetarët dhe aktivistët raportojnë për shënjestrim të vazhdueshëm dhe ndërhyrje të dhunshme.
Sipas të dhënave nga Rrjeti SafeJournalists, gjatë vitit 2026 janë evidentuar 27 raste të sulmeve ose kërcënimeve ndaj gazetarëve, me një përshkallëzim të dukshëm në dy muajt e fundit, ku janë shënuar 15 incidente gjatë qershorit dhe korrikut. Raportimet tregojnë se forcat e policisë kanë përdorur ujë me presion dhe gaz lotsjellës ndaj protestuesve, duke cenuar sigurinë e punonjësve të medias që ndiqnin këto tubime.
Kërkesat drejtuar autoriteteve shqiptare
Organizatat nënshkruese kanë renditur disa kërkesa specifike për qeverinë shqiptare:
• Garantimin e sigurisë për gazetarët dhe punonjësit e medias, duke u mundësuar atyre raportimin e lirë pa frikësim.
• Zbatimin strikt të Protokollit të Policisë së Shtetit për Sigurinë e Gazetarëve dhe sigurimin që menaxhimi i tubimeve të jetë në përputhje me parimet e proporcionalitetit dhe ligjshmërisë.
• Hetimin e pavarur dhe transparent të çdo incidenti të raportuar, pavarësisht nëse autorët janë pjesë e policisë, zyrtarë publikë apo aktorë të tjerë.
• Ndalimin e praktikës së etiketimit të gazetarëve, aktivistëve dhe mbrojtësve të mjedisit si persona të paguar ose të drejtuar nga interesa të huaja, praktikë kjo që sipas IFJ nxit ngacmimet dhe dekurajon debatin demokratik.
Apeli i bën thirrje gjithashtu Bashkimit Europian, Këshillit të Europës, OSBE-së dhe misioneve diplomatike të pranishme në Tiranë që të kërkojnë llogari nga autoritetet për këto zhvillime, duke theksuar se incidente të tilla nuk duhet të përdoren për të delegjitimuar lëvizjet qytetare apo për të kufizuar lirinë e informimit.