Instituti i Gjeoshkencave (IGJEO) ka njoftuar se gjatë pasdites së të dielës dhe ditës së hënë, më 6 korrik, disa qarqe do të përballen me një nivel të shtuar rreziku nga zjarret në pyje. Qarqet Lezhë, Durrës dhe Fier janë identifikuar si më të rrezikuarat.
Në qarqe të tjera, niveli i rrezikut është vlerësuar si më i ulët:
• Niveli i moderuar: Shkodër, Tiranë, Elbasan, Berat, Vlorë dhe Gjirokastër.
• Niveli i ulët: Kukës, Dibër dhe Korçë.
Instituti thekson se rreziku do të jetë lokalisht i lartë në zona specifike si: jugu i Shkodrës, perëndimi i Tiranës, perëndimi i Elbasanit, perëndimi i Beratit dhe veriperëndimi i Vlorës.
Sa i përket motit, ditën e hënë priten reshje të dobëta në Shkodër dhe Kukës, si dhe reshje lokale të dobëta në Dibër, Lezhë, Elbasan, Berat, Korçë dhe Gjirokastër. Temperaturat maksimale do të shënojnë vlera deri në:
• 31°C në bregdet.
• 34°C në zonat e ulëta.
• 27°C në zonat malore.
Era do të fryjë e lehtë deri mesatare, por në zonat malore dhe përgjatë bregdetit pritet të forcohet herë pas here. Instituti u bën apel qytetarëve të tregojnë kujdes maksimal për parandalimin e zjarreve në mjedis.
Përditësime
Instituti i Gjeoshkencave (IGJEO) ka zgjeruar hartën e qarqeve me rrezik të lartë zjarri, duke përfshirë tashmë edhe Tiranën, krahas Fierit, Lezhës dhe Durrësit. Përditësimet meteorologjike janë si vijon: temperaturat maksimale në zonat e ulëta do të arrijnë 33°C, ndërsa në qarqet Kukës dhe Dibër priten reshje të izoluara.