Instituti i Gjeoshkencave ka njoftuar se rreziku për zjarre në pyje do të jetë i lartë gjatë pasdites së kësaj të hëne dhe përgjatë ditës së martë. Sipas parashikimeve, rreziku vlerësohet si i lartë në nëntë qarqe: Lezhë, Durrës, Tiranë, Elbasan, Fier, Berat, Korçë, Vlorë dhe Gjirokastër.
Ndërkohë, në qarqet Shkodër, Kukës dhe Dibër, niveli i rrezikut parashikohet i moderuar. Megjithatë, instituti nënvizon se në zona specifike, si jugperëndimi i qarkut Shkodër dhe ai i Dibrës, rreziku do të jetë lokalisht i lartë. Situata meteorologjike pritet të jetë më e rënduar gjatë ditës së martë, kur temperaturat do të shënojnë rritje të ndjeshme.
Sipas të dhënave, temperaturat maksimale për të martën do të jenë:
• 37°C në zonat bregdetare
• 40°C në zonat e ulëta
• 33°C në zonat malore
Sa i përket reshjeve, parashikohen reshje të dobëta të shoqëruara me shtrëngata lokale në Shkodër dhe Kukës, ndërsa reshje të dobëta do të ketë edhe në Dibër e Lezhë. Në qarqet Tiranë, Elbasan, Korçë dhe Gjirokastër priten reshje lokalisht të dobëta. Era do të fryjë e lehtë deri mesatare, me përjashtim të zonave malore, ku për periudha të shkurtra pritet erë e fortë.
Përditësime
Instituti i Gjeoshkencave ka përditësuar parashikimin për rrezikun e zjarreve në pyje, duke zhvendosur alarmin për rrezik të lartë në 9 qarqe për ditët e martë (04) dhe e mërkurë (05). Autoritetet u bëjnë thirrje qytetarëve të shmangin ndezjen e zjarreve në hapësira të hapura dhe të raportojnë çdo vatër të dyshimtë pranë shërbimeve vendore për ndërhyrje të shpejtë.