Instituti Hidrometeorologjik i Kosovës (IHMK) ka njoftuar parashikimin e motit për fundjavën në Kosovë.
Të shtunën pritet mot kryesisht i vranët me intervale të herëpashershme me diell. Gjatë ditës, vranësirat konvektive lokalisht shoqërohen me riga shiu dhe shkarkime rrufesh në zona të kufizuara. Temperaturat minimale lëvizin ndërmjet 7-10°C, maksimalet ndërmjet 16-19°C. Era fryn nga verilindja dhe veriperëndimi me shpejtësi 1-11 m/s.
Të dielën parashihet mot me vranësira të ndryshueshme dhe intervale më të gjata me diell për shkak të stabilizimit gradual të kushteve atmosferike. Temperaturat minimale lëvizin ndërmjet 6-9°C, maksimalet arrijnë nga 19-22°C. Era fryn e lehtë deri mesatare nga drejtimi i juglindjes.
Kushtet agrometeorologjike gjatë fundjavës janë përgjithësisht të favorshme për zhvillimin e kulturave bujqësore pranverore, sidomos për perimet dhe drithërat në fazat intensive të vegjetacionit. Reshjet lokale të fundit ruajnë lagështinë në shtresat sipërfaqësore të tokës, ndërsa intervalet me diell dhe temperaturat relativisht të buta favorizojnë aktivitetin fiziologjik të bimëve.
Fermerëve u rekomandohet të planifikojnë trajtimet fitosanitare dhe aktivitetet në parcela kryesisht gjatë periudhave pa reshje dhe me erë më të dobët, për shkak të mundësisë së proceseve konvektive dhe shkarkimeve elektrike në disa zona.