Instituti Kombëtar i Shëndetësisë Publike të Kosovës (IKSHPK) ka rikujtur se vaksinimi ka qenë një nga masat më të suksesshme të shëndetit publik për dekada me radhë në Kosovë. Ky proces ka parandaluar dhe eliminuar sëmundje që dikur ishin të zakonshme dhe shpesh fatale për fëmijët.
Sipas IKSHPK-së, falë vaksinimit të rregullt sipas Kalendarit të Vaksinimit:
• Poliomieliti (paraliza e fëmijëve) është eliminuar.
• Difteria dhe tetanusi janë bërë shumë të rralla.
• Rubella e lindur, që shkaktonte verbëri dhe dëmtime të rënda, është parandaluar.
• Fruthi, shkak i shpeshtë i hospitalizimeve dhe vdekjeve, është vënë nën kontroll falë vaksinës MMR (fruth–parotit–rubellë).
Instituti ka sqaruar se informacionet e përhapura kohët e fundit, sipas të cilave vaksina MMR shkakton autizëm, nuk kanë bazë shkencore. “Shkenca ka vërtetuar qartë se vaksina MMR nuk lidhet me autizmin. Këtë e konfirmojnë Organizata Botërore e Shëndetësisë (OBSH), Qendrat Amerikane për Kontroll dhe Parandalim të Sëmundjeve (CDC), Agjencia Evropiane e Barnave (EMA), si dhe studime të shumta ndërkombëtare që kanë përfshirë miliona fëmijë”, thuhet në njoftimin e IKSHPK-së.
IKSHPK thekson se vaksinimi është mënyra më e mirë për mbrojtjen e fëmijëve nga sëmundje të rrezikshme. Rreziku më i madh për shëndetin vjen nga mosvaksinimi, jo nga vaksinat. Vaksina MMR mbron nga fruthi, shytat dhe rubella, ndërsa fruthi mund të shkaktojë komplikime serioze si infeksione të mushkërive, dëmtime të trurit dhe humbje jete në raste të rënda. Instituti këshillon prindërit të drejtohen te profesionistët shëndetësorë për informacion të saktë.