Instituti Kombëtar i Shëndetësisë Publike të Kosovës (IKShPK) ka njoftuar publikun mbi situatën epidemiologjike të fruthit në vend. Sipas të dhënave zyrtare, gjatë periudhës nga 16 prilli deri më 20 shtator 2026, janë konfirmuar gjithsej 172 raste me këtë sëmundje. Vetëm gjatë javës së fundit janë shënuar 7 raste të reja.
Nga analizat e kryera nga institucioni, del se mbi 95% e personave të prekur nuk kanë qenë të vaksinuar me vaksinën MMR, e cila ofron mbrojtje kundër fruthit, shytave dhe rubeolës. Përballë këtyre shifrave, IKShPK thekson se vaksinimi mbetet masa më e rëndësishme për mbrojtjen e shëndetit të fëmijëve dhe komunitetit.
Për të rritur mbulesën vaksinale, autoritetet shëndetësore kanë intensifikuar vaksinimin e vonuar, të njohur si "catch-up", duke u mundësuar fëmijëve që kanë humbur dozat e planifikuara t'i marrin ato. Gjatë vitit 2026, mbi 3,176 fëmijë të grup-moshës 2–5 vjeç janë vaksinuar përmes kësaj metode. Instituti ka vlerësuar angazhimin e prindërve dhe të profesionistëve shëndetësorë për përpjekjet në parandalimin e përhapjes së sëmundjes.