Gjatë seancës së mbajtur në GJKKO, kryetari i Partisë së Lirisë, Ilir Meta, shprehu revoltën ndaj procesit gjyqësor, të cilin e cilësoi si të politizuar. Ish-presidenti akuzoi prokurorët se kanë mbajtur të fshehura informacione thelbësore lidhur me faturat e lobimit me McKeon Group.
Sipas Metës, megjithëse për këtë çështje ekziston vetëm një pagesë prej 15 mijë USD e kryer me vendim të kryesisë, prokuroria ka vepruar në mënyrë të njëanshme. Ai deklaroi se pas arrestimit të tij më 21 tetor, kanë ardhur përgjigje saktësuese nga autoritetet amerikane të cilat nuk i janë bërë të ditura mbrojtjes. Lidhur me regjistrimet në portalin FARA, ai sqaroi se ato shërbejnë për transparencë dhe nuk implikojnë nënshkrimin e tij personal në marrëveshjen me GSIS.
Në dëshminë e tij, Meta u ndal edhe te çështja CEZ-DIA, duke deklaruar se ish-bashkëshortja e tij, Monika Kryemadhi, nuk ka asnjë përgjegjësi për këtë dosje dhe se ai mban përgjegjësi vetëm për veprimet e tij individuale. Ai gjithashtu pretendoi se prokuroria ka fshehur dëshminë e vitit 2011 të Hejsek.
Gjatë seancës, trupi gjykues rrëzoi kërkesat e Ilir Metës për transmetim të drejtpërdrejtë të procesit dhe për largimin e tij nga kafazi i xhamit, duke lejuar vetëm aksesin në provat digjitale.