Në GJKKO është zhvilluar seanca e radhës për procesin gjyqësor ndaj ish-presidentit Ilir Meta dhe ish-deputetes Monika Kryemadhi. Përfaqësimi ligjor i Monika Kryemadhit u sigurua nga avokatja Esmeralda Rama, pasi avokati i saj, Redi Llanaj, nuk u lejua të hyjë në sallë për shkak të refuzimit për t’iu nënshtruar protokolleve të sigurisë dhe kontrollit të çantës.
Avokati i Ilir Metës, Kujtim Cakrani, ka parashtruar një sërë kundërshtimesh lidhur me provat e paraqitura nga prokuroria në dosjen CEZ-DIA. Mbrojtja argumentoi se akuzat janë të pabazuara dhe se në vitin 2009, kur pretendohet të ketë ndodhur komunikimi përmes një mesazhi, Ilir Meta ka qenë deputet opozitar dhe jo funksionar publik. Mbrojtja gjithashtu pretendoi se mesazhi "deri nesër më duhen 200" nuk gjendet në dosje.
Ndër kërkesat e tjera të mbrojtjes ishte përjashtimi i dëshmisë së të ndjerit Dritan Prifti, me argumentin se deklaratat e tij të dhëna në vitin 2015 janë marrë para regjistrimit të procedimit penal dhe se ai ka qenë në konflikt të hapur me Ilir Metën. Avokati kërkoi gjithashtu përjashtimin e materialeve të tjera, si videot e intervistave të bashkëshortes së Kastriot Ismailajt dhe vendimeve të arbitrazhit, duke pretenduar se ato janë siguruar pa vendim gjykate dhe në shkelje të ligjit.
Përditësime
Seanca e themelit për Ilir Metën dhe Monika Kryemadhin u shoqërua me përplasje të ashpra verbale mes çiftit brenda sallës së gjyqit. Monika Kryemadhi akuzoi Ilir Metën se po shndërrohet në 'ushtar të SPAK', duke kundërshtuar akuzat për përfitime nga Ardian Shatku. Avokati Genc Cakrani kundërshtoi provat e prokurorisë, duke argumentuar se SPAK nuk ka kryer një analizë financiare të plotë për pasurinë e Metës. Ndërkohë, mbrojtja solli në vëmendje kallëzimin e Romeo Karajt për çështjen CEZ-DIA, i cili fillimisht ishte adresuar ndaj Sali Berishës dhe kabinetit të tij qeverisës.