Ish-presidenti Ilir Meta, i cili ndodhet në paraburgim që prej datës 21 tetor 2024 nën akuzat për korrupsion, pastrim parash dhe fshehje pasurie, ka ndërmarrë veprime ligjore ndaj punonjësve të institucionit të vuajtjes së dënimit 313. Ai ka ankimuar në Gjykatën e Tiranës vendimin e Prokurorisë së Tiranës për mbylljen e verifikimeve pa nisur procedim penal.
Në kallëzimin e tij, Ilir Meta denoncon shpërdorim detyre nga ana e punonjësve të këtij institucioni. Pretendimet e tij lidhen me mënyrën e trajtimit gjatë qëndrimit në paraburgim, si dhe me kufizimin e komunikimeve. Organi i akuzës, pas kryerjes së verifikimeve përkatëse, arriti në përfundimin se nuk ka elementë të mjaftueshëm për të ngritur përgjegjësi penale ndaj personave të denoncuar, duke vendosur mbylljen e çështjes.
Përmes ankimimit, ish-kreu i shtetit kërkon nga gjykata rrëzimin e këtij vendimi dhe urdhërimin e prokurorisë për të vijuar me hetime të mëtejshme. Çështja është duke u shqyrtuar nga gjyqtarja Vjollca Sahiu, e cila pritet të vendosë nëse do të pranojë kërkesën e Metës për rinisjen e hetimeve apo nëse do të lërë në fuqi vendimin e prokurorisë.
Përditësime
Gjykata e Tiranës ka rrëzuar përfundimisht kërkesën e Ilir Metës për rihapjen e hetimeve mbi kallëzimin nr. 272, datë 21.01.2026, ndaj punonjësve të Burgut 313. Vendimi është marrë në dhomë këshillimi, pa praninë e palëve, pasi gjykata e vlerësoi kërkesën si të pabazuar në prova dhe ligj.