Ish-presidenti Ilir Meta reagoi pas seancës gjyqësore të së shtunës në Gjykatën e Posaçme Kundër Korrupsionit dhe Krimit të Rëndë Organizuar (GJKKO), duke deklaruar se Prokuroria ka rrëzuar akuzën kryesore ndaj tij për lobim të pretenduar prej 1 milion dollarësh për një foto me ish-Presidentin amerikan Donald Trump.
Sipas Metës, në gjykimin në themel, prokurori pranoi se bëhet fjalë vetëm për një pagesë ligjshme prej 15 mijë dollarësh ndaj kompanisë McKeon Group. Ai theksoi se këtë shumë e ka deklaruar publikisht dhe para SPAK-ut para tre vitesh, kur është thirrur për këtë çështje.
Meta akuzoi mediat e huaja Mother Jones dhe Kronen Zeitung për publikime të rreme, të sponsorizuara sipas tij nga paratë e inceneratorëve dhe mafia ndërkombëtare. Këto artikuj, sipas tij, shërbyen për ndërtimin e kallëzimit të rremë dhe akuzës kryesore, mbi të cilën u mbështet izolimi i tij politik për 19 muaj.
Në fund të reagimit të tij nga qelia, Meta u bëri thirrje mbështetësve për durim, duke premtuar se edhe akuzat e tjera ndaj tij do të çmontohen njëra pas tjetrës.
Reagimi i plotë i Metës:
"Sot, në seancën radhës të gjykimit në themel, vetë Prokuroria rrëzoi akuzën kryesore ndaj meje për gjoja lobimin 1 milion USD për një foto me Presidentin Trump. Para gjykatës prokurori pohoi se bëhet fjalë vetëm për një pagesë të ligjshme prej 15 mijë USD për McKeon Group, pikërisht ajo që kam deklaruar publikisht, por edhe në SPAK, që para 3 vitesh, kur jam thirrur për këtë çështje. Shikoni tani titujt e lajmeve të rreme të 'Mother Jones' dhe 'Kronen Zeitung', të sponsorizuara me paratë e inceneratorëve dhe të mafias ndërkombëtare, mbi të cilat u ndërtua kallëzimi i rremë dhe akuza kryesore kundër meje, akuzë mbi të cilën u mbështet rrëmbimi dhe izolimi im politik prej 19 muajsh, akuzë që sot u rrëzua nga vetë Prokuroria. Durim! Edhe akuzat e tjera do të çmontohen njëra pas tjetrës."